Екипите на Престон Норт Енд и Дерби Каунти се соочија во рамките на четириесеттото коло од тековната Чемпионшип сезона.
За домаќините (Престон), ова беше вкупно 5000. професионален лигашки натпревар во историјата станувајќи првиот тим што стигнал до ова достигнување. Веднаш зад Престон се наоѓаат Нотс Каунти (4986), Барнли (4936), Вулверхемптон (4924) и Дерби Каунти (4894).
Исто така, денешниот меч на Престон беше и негов јубилеен 2000. во втората англиска лига. Досега, во првата лига, Престон има одиграно 1720, во третата – 1058 и во четвртата – 222 натпревари.
Денешното соочување со Дерби беше вкупно 108. нивен меѓусебен натпревар во историјата, правејќи ги „Овните“ четврти најчест противник на Престон. Пред Дерби, на оваа листа се наоѓаат само Вулверхемптон (116), Болтон (124) и Барнли (126).
Во своите пет илјади професионални лигашки натпревари, тимот од „Дипдејл“ има забележано 1940 победи, 1284 ремија и 1776 порази.
Вредно е да се напомене дека Престон Норт Енд е првиот шампион на Англија освојувајќи ја лигата во инаугуралните две сезони – 1888/89 и 1889/90.
