Откако од ноември 2020 беше откупена од холивудските ѕвезди, Рајан Рејнолдс и Роб МекЕлени, екипата на Рексам цели кон високи успеси.
Рексам се наоѓа во Велс, но се натпреварува во англиската Национална Лига од каде што мечтае за промоција и за враќање во Лиг 2 за првпат после 2008.
Најпрво, актерите го доведоа на кормилото искусниот Фил Паркинсон, кој само една година претходно го предводеше Сандерленд во Лиг 1.
Денес, Велшаните ја најавија новата трансфер-бомба, односно за главен играч во нападот го назначија Пол Малин.
Минатата сезона, Малин беше дел од Кембриџ Јунајтед и во дресот на клубот од универзитетскиот град одигра 46 лигашки натпревари.
Во тој интервал, Англичанецот постигна неверојатни 32 погодоци, кои не само што му ја донесоа златната копачка во четвртата лига, туку претставуваат и рекорд по бројот на постигнати голови во оваа дивизија.
Исто така, Малин стана и првиот фудбалер во историјата на Кембриџ Јунајтед, кој постигнал 32 голови во една сезона.
Сепак, 26-годишниот напаѓач, на 28 јули одби да потпише нов договор со Јунајтед и како слободен играч се пресели во Велс.
Малин и Рексам најавија тригодишна соработка и покрај тоа што англискиот фудбалер беше мета на бројни третолигаши од кои најголем фаворит беше Чарлтон.
Во својата сениорска кариера, Малин настапуваше за неколку екипи (Хадерсфилд, Вауксхал Моторс, Моркамб, Свиндон и Транмер), но никогаш не го покажа својот потенцијал, кој го криеше сè до минатата сезона.
