Шестата локација од овосезонскиот Светски куп во алпско скијање во машка конкуренција беше италијанската Алта Бадија.
По изминатите брзински дисциплини во Вал Гардена, на денешната програма се врати велеслаломот – четврти во новата сезона.
Во првата серија, Алексис Пантуро (1:13,27) беше најбрз од сите, а во шест десетинки се наоѓаа Филип Зубчиќ (+0,26), Марко Одермат (+0,40), Атле Лие МекГрат (+0,46), Лукас Браатен (+0,51), Жан Крањец (+0,60) и Леиф Кристијан Хауген (+0,60).
Во втората серија, повеќето од водечките потфрлија, а тоа најдобро го искористи Жистин Муризие, кој го оствари првиот подиум во кариерата во велеслалом. Швајцарецот напредна од единаесеттото до третото место и имаше заостаток од 24 стотинки во однос на Алексис Пантуро.
Имено, Пантуро успеа ,,за влакно” да ја одбрани предноста од првата серија, односно да ја претвори во првиот овосезонски подиум во велеслалом годинава. Воедно, за Французинот ова беше и прва победа во Алта Бадија.
Сепак, јунакот на денот беше 20-годишниот Норвежанец, Атле Лие МекГрат, кој со стартен број 29, за само 7 стотинки ја изгуби првата победа во кариерата. За него, второто место е далеку најдобар пласман во Светскиот куп.
Освен горенаведените скијачи, заостаток под една секунда имаа: Марко Одермат (+0,28), Томи Форд (+0,41), Александер Омодт Килде (+0,76), Александер Шмид (+0,90), Штефан Бренштајнер (+0,91), Жан Крањец (+0,93) и Филип Зубчиќ (+0,94).