На 4 октомври, во недела, во Лондон ќе се одржи фамозниот Лондонски маратон. Светот беше во долго исчекување на оваа трка бидејќи требаше, во директен дуел, да се соочат двете најголеми ѕвезди – Елиуд Кипчоге и Кенениса Бекеле.
Кипчоге е светски рекордер на оваа дисциплина со време од 2:01:39 часа, поставено на 16 септември 2018 во Берлин. Исто така, Кениецот е и единствен човек што ја истрчал маратонската дистанца за помалку од два часа, но не на трка, туку на специјално организиран настан.
Од друга страна, Бекеле важи за еден од најдобрите тркачи во историјата со бројни светски рекорди во својата кариера. Етиопиецот, минатата година, во Берлин, го постави второто најбрзо маратонско време во историјата, кое беше само две секунди послабо од актуелниот светски рекорд.
Сепак, Бекеле денес јавно соопшти дека нема да трча во Лондон.
,,Многу сум разочаран бидејќи нема да можам да трчам во недела.
Поминав тежок подготвителен период, со карантин, кога не можев да го имам со мене мојот тим. Бев во добра форма, но потоа почувствував болка во листот на левата нога, после двете врзани брзи тренинг сесии во последните недели од подготовките.
Оттогаш, имав третмани секој ден и навистина верував дека ќе бидам подготвен, но денес болката е полоша и знам дека нема да можам да се тркам.
Оваа трка беше навистина важна за мене. Минатиот пат, во Берлин, добив самодоверба и мотивација, па едвај чекав да се покажам повторно, работев напорно на тоа. Знам дека многу луѓе низ светот едвај ја чекаа тркава и жал ми е што ќе ги разочарам моите фанови, организаторите и натпреварувачите. Ќе ми треба време за да се опоравам и се надевам дека ќе учествувам во Лондон наредната година.” – се огласи Бекеле на својот официјален Инстаграм профил.



