Првиот натпревар од 23. коло од англискиот Чемпионшип, а воедно и првиот во 2021 година, го одиграа екипите на Шефилд Венздеј и на Дерби Каунти.
Накрај, Венздеј успеа да триумфира со 1-0, иако Дерби беше тимот што комплетно ја имаше иницијативата.
,,Овните” имаа неколку исклучително добри шанси, вклучувајќи ја и погодената пречка на Колин Казим-Ричардс во средината на првото полувреме. Екипата предводена од Вејн Руни беше оштетена и во последните мигови, кога судијата Мет Донохи не досуди чист пенал по играта со рака на Кадим Херис во својот шеснаесетник.
Од друга страна, Венздеј ја материјализираа една од ретките свои шанси, откако Калум Патерсон (61′) најдобро се снајде во гужвата пред голот на Дејвид Маршал.
За Шефилд Венздеј ова е трет триумф на последните четири средби за излез од ,,црвената” зона и покрај казната од шест поени, потиснувајќи го Дерби на 21. место.
