На деветтата овосезонска трка во Мото 3 категоријата, до втората победа оваа година дојде Италијанецот Денис Фоџа.
Возачот на ,,Леопард Рејсинг” беше водечки во поголемиот дел од трката и накрај заслужено прв ја помина целната линија во Асен, Холандија.
Зад него, на втората позиција заврши Шпанецот Серхио Гарсија, додека најниското место на пиедесталот му припадна на Романо Фенати, кој се искачи на подиумот по вторпат сезонава.
Како четвртопласиран на целта пристигна Дерин Биндер, кој поради казна беше преместен на седмото место.
Од целата ситуација профитираа Педро Акоста, Татсуки Сузуки и Џон МекФи.
Токму Акоста, кој е првопласиран во генералниот пласман, беше херој на денот, откако вчера не беше ,,фит” за денешната трка, а денес освои тринаесет бодови.
