Последната овосезонска трка од Светскиот куп во санкање на вештачки патеки во женска конкуренција беше одржана денес во швајцарскиот Ст. Моритц.
На неа, беше решена борбата за титулата во која учествуваа Натали Гајзенбергер и Јулија Таубитц.
Првата серија беше проследена со исклучително силни снежни врнежи што резултираше со лоши изданија на најголемите фаворитки.
Имено, Таубитц ја заземаше деветтата (+0,758), а Гајзенбергер – осумнаесеттата позиција (+1,200). Водечка беше Летонката Кендија Апарјоде (56,728), а на второто и на третото место беа Шејен Розентал (+0,271) и Натали Мааг (+0,337).
Во втората серија повторно преовладуваа истите услови, а до првата победа во кариерата дојде Летонката Елина Иева Витола (1:53,618), која беше петта после првото санкање.
Јулија Таубитц успеа да се искачи до втората позиција (+0,252), а Мааг (+0,279) го задржи своето одлично трето место.
Заостаток под една секунда имаа Дајана Ајтбергер (+0,295), Шејен Розентал (+0,303), Кендија Апарјоде (+0,502), Лиза Шулте (+0,504), Марион Оберхофер (+0,657) и Елиза Тирума (+0,896).
Гајзенбергер ја заврши трката на тринаесеттото место (+1,532), но сепак, поради второто место на Таубитц, успеа да ја освои титулата со 19 поени предност во однос на својата сонародничка.
📸 JFK/EXPA/AFP via Getty Images
