Единаесеттото коло од италијанската Серија Б беше отворено во несекојдневниот понеделнички термин од 12.30 часот.
Во дербито, на стадионот ,,Чиро Вигорито”, Бреша го порази составот на Беневенто со минимални 0-1.
Натпреварот изобилуваше со шанси и на двете страни, но одличните реакции во одбраната и на двете екипи спречија повеќе голови.
Во 85. минута, Енрико Брињола имаше стопроцентна шанса после одличниот контранапад на Беневенто, но неговиот шут помина покрај десната голманска статива.
Оваа ситуација им се ,,одби од глава” на домаќините во 88. минута, кога Матео Трамони ја искористи грешката на дефанзивецот Гаетано Летиција и го постигна победоносниот гол за Бреша.
Со новите три бодови и со натпревар повеќе во однос на конкурентите, Бреша се израмни на првото место со Пиза, додека Беневенто е третопласиран со два поени заостаток.
Инаку, денешниот натпревар беше прв во историјата од втората лига, кој во Италија бил пренесуван со модерна технологија, односно со резолуција од 4К.
