По неколку сушни години светска ѕвезда од прва категорија доаѓа во Примера. Во период кога долгот на Барселона изнесува преку една милијарда евра, каталонскиот гигант го договори фудбалерот кој во последните две години е суверена „Златна копачка“ на Европа и жив кошмар за противничките голмани.
Роберт Левандовски се сели од Баерн во Барселона за сума од 45 милиони евра, плус дополнителни бонуси од пет милиони евра, ако се исполнат одредени тимски и индивидуални успеси. Договорот меѓу клубовите е постигнат и прашање на часови е кога ќе го официјализираат преминот на полскиот напаѓач во Шпанија. Левандовски инсистираше на трансфер само во Барса, и по три тренинзи со Баерн, ќе се спакува и викендов ќе замине на турнејата на Барселона во Соединетите Американски Држави. Неговото деби во дресот на Барса се очекува во „Ел Класико“ дуелот против Реал во Лас Вегас на 24 јули.
По враќањето во Европа. Левандовски ќе биде претставен, веројатно пред натпреварот „Трофеј Жоан Гампер“, во чест на основачот на клубот од Каталонија, предвиден за седми август.
Полската гол-машина ќе потпише договор на три сезони, со опција и за четврта ако двете страни бидат задоволни.
