Овосезонското 69. издание на Новогодишната турнеја во ски скокови започна денес, со квалификациите во Оберстдорф.
Истите беа проследени со исклучително силен ветар и обилни врнежи од снег.
Поради временските услови, потфрлија повеќе скокачи што значи дека на утрешното натпреварување, нè очекуваат неколку интересни парови: Домен Превц – Маркус Ајзенбихлер; Јохан Андре Форфанг – Штефан Крафт; Андреас Велингер – Зеверин Фројнд и Јукија Сато – Даниел Хубер.
Најдолгиот денешен скок од 128,5 метри му ја донесе првата позиција на Филип Ашенвалд, а во првите десетмина се пласираа уште: Халвор Егнер Гранеруд, Цене Превц, Даниел Хубер, Рјоју Кобајаши, Анти Аалто, Роберт Јохансон, Анже Ланишек, Џовани Бресадола и Грегор Дешванден.
Важно е да се напомене дека поради позитивниот КОВИД-19 тест на Клеменс Муранка, сите полски скокачи нема да скокаат во Оберстдорф, а најверојатно и на цела турнеја. Освен Муранка, овде спаѓаат актуелниот шампион Давид Кубацки, поранешниот освојувач Камил Штох, Пјотр Жила, Мачиеј Кот, Александер Жнишчол и Андржеј Стекала.
