Една од нашите најпопуларни фолк-пејачки, Ирена Вељовска, деновиве направи жешка фотосесија за рекламирање на неколку парчиња облека.
За атмосферата да биде уште поегзотична, придружба на Ирена и’ правеше јастребот Хари, припадник на сортата Харисон што влече потекло од Јужна Америка.
Во врска со оваа фотосесија, ексклузивно за ,,Јави се јужна”, Ирена одговори на неколку прашања.
- Која беше целта и намената на оваа фотосесија?
- Неизбежно беше едно мало освежување на мојот профил и како дама и како јавна личност. Посакав да направам нешто природно и исклучително моќно. Пробав да ја претставам жената како кралица на слободата и убавиот шарм. И… Сето тоа преплетено со волшебните крилја на една птица грабливка. Тоа сме ние жените – слободни, своеглави, воздржани, недостижни, елегантни, природни, свои…
- Како дојдовте до идеја да го вклучите јастребот Хари во вашата фотосесија и до контакт со соколарот Трајче Китановски?
- Идејата се создаде сама по себе. Долго време размислував за овој проект. Ниту шминката, ниту облеката, ниту ноктите не беа случаен избор. Секој посебен дел го влечеше со себе оној… нареден. Се нижеа убави емоции, амбиент и сè што е потребно за одлични резултати. А како дојдов до контакт со Трајче, е одлична приказна која ќе ја оставам за некоја наредна прилика.
- Судејќи по фотографиите, имаме впечаток дека се познавате со јастребот подолго време. Дали претходно имавте некоја обука или има други фактори што се одговорни за вашата природност во присуство на птицата?
- Хахаха, одличен впечаток. Не се познававме претходно и на почетокот имав некоја блага трема, но за кратко време сфатив дека најважно е тој да ја осети мојата љубов и топлина. Исто како со нас жените. Хахха внимателно му се додворував, ја почитував секоја негова одлука, бев трпелива, се опуштив и уживав во неговото друштво. Зарем не е така и во реалниот живот?
Освен Ирена, на неколку прашања ни одговори и соколарот Трајче Китановски.
- Чија беше идејата за локацијата на фотосесијата?
- Локацијата на фотосесијата беше оставена на мене, веројатно дека Ирена и останатиот дел од екипата знаеја дека јас секојдневно ги крстосувам нашите шуми и планини. Штом Ирена ми ја презентира целокупната нејзина замисла околу фотосесијата, јас веднаш знаев дека тоа мора да се случи во шумата во Волково, каде од една страна е прекрасно распространетото поле, а од друга страна густа борова шума.
- Според Вас, дали Ирена добро се снајде во придружба на јастребот, имајќи во предвид дека претходно немала такво искуство?
- Да, прво искуство и’ беше од ваков карактер и морам да признаам, пријатно ме изненади во позитивна смисла на зборот. Ги следеше низ цела фотосесија моите инструкции со примеси на нејзината грациозност и префинетост на крајот се покажа како добитна комбинација. Познавајќи ја Ирена дека е авантурист знаев дека со Хари ќе се сложуваат.








