Елиф Елмас доби можност од Карло Анчелоти за настап од 72. минута и веднаш покажа дека се работи за класа фудбалер и дека ќе биде големо засилување за тимот. По неговото влегување во игра наполитанците ја задржаа топката во свој посед и во ниту еден момент не и дозволија на Фиорентина да се понадева дека повторно ќе дојде до нерешен резултат.
Натпреварот изобилуваше со многу шанси и погодоци, а крајниот резултат е 3:4 и триумф за гостите од Неапол. Први во водство беа домаќинте кога Пулгар во 9. минута успешно го реализира ударот од белата точка, а до крајот на полувремето следуваше пресврт кога најпрвин Мертенс со шут од далечина израмни на 1:1, а над истиот фудбалер беше направен пенал кој успешно за 1:2 го реализира Инсиње.
И второто полувреме беше проследено со многу погодоци и возбудувања и веќе до средината на вториот дел веќе беше поставен конечниот резултат, каде што во 52. минута Миленковиќ израмна на 2:2, на спротивната страна во 56. минута Калјехон го врати водството, но тука не беше крајот, затоа што нововлезениот Боатенг со убав гол од далечина израмна на 3:3, а конечните 3:4 за три бода ги постави Инсиње во 67 минута.



