Во второто коло од групата Г, Србија ремизираше со Камерун со 3-3 во исклучително интересен натпревар.
По двете големи шанси на Александар Митровиќ во воведниот дел, Камерунците ги изненадија своите ривали и поведоа преку Жан-Шарл Кастељето (29′).
Сепак, во судиското продолжение на првото полувреме, Србите направија пресврт со головите на Страхиња Павловиќ (45+1′) и на Сергеј Милинковиќ-Савиќ (45+3′).
Во вториот дел, Митровиќ успеа да се запише во листата на стрелците за водство на нашиот северен сосед од 1-3.
Откако влезе во игра во 55. минута, на сцена стапи Винсент Абубакар, кој беше главен ,,виновник” за израмнување на резултатот.
Абубакар стана првиот африкански играч што запишал и гол и асистенција на еден натпревар од СП, откако влегол во игра како резерва.
Фудбалерот на Ал-Наср погоди за 2-3 во 63. минута, а неполни 180 секунди подоцна му асистираше на капитенот Ерик Максим Чупо-Мотинг (66′).
Доколку вечерва Бразил ја совлада Швајцарија, Србија ќе има шанса за влез во нокаут-фазата, кога во третото коло во директен дуел ќе ги одмери силите со европскиот противник.
Автор: Епов Насе
