Јубилејното осумдесетто издание на осумдневната велосипедска трка Париз – Ница се одвиваше во текот на изминатата недела.
Истото, за првпат во кариерата, заврши во рацете на Примож Роглич, кој помина вкупно 29:19:15 часа на патеката во текот на сите осум етапи.
Притоа, Словенецот ја освои седмата етапа, а заврши на победничкиот пиедестал во уште три наврати.
Освен Роглич, по една етапна победа имаа уште: Кристоф Лапорт, Фабио Јакобсен, Мадс Педерсен, Воут ван Аерт, Брендон МекНалти, Матје Бургодо и Сајмон Јејтс.
Во генералниот пласман, зад победникот, во топ 5, се пласираа: Сајмон Јејтс (+00:29), Даниел Мартинез (+02:37), Адам Јејтс (+03:29) и Наиро Кинтана (+03:43).
Како најдобар тим на трката се покажа ,,УАЕ Тим Емирејтс”, а во поредоците за најмногу поени, за најдобар планински и за најдобар млад возач славеа Воут ван Аерт, Валентан Мадуа и Жоао Алмеида.
