75. досегашно издание на Дварс доор Флаандерен (во превод: Низ Фландрија) беше единаесеттата трка од новата сезона во велосипедизам.
Истата се одржа денес, традиционално со почеток од Роселаре и со финиш во Варегем, на тлото на западна Фландрија, Белгија.
На патеката од 184,1 километри, најбрз, со време од 3:59:05, беше Дилан Ван Баарле, кој тргна во бегство на 53 километри до крајот.
За Холанѓанецот, ова беше втора еднодневна победа во кариерата, односно прва после националното хронометарско првенство во 2018.
Со тоа, тимот на ,,Инеос” дојде до втората престижна победа во само три дена, откако во неделата, Адам Јејтс ја освои седумдневната трка низ Каталонија.
Денешниот подиум го комплетираа двајца велосипедисти што ја предводеа првата група (+0:27), односно Кристоф Лапорт (Кофидис) и Тим Мерлиер (Алпесин-Феникс).
Пласман во првите пет обезбедија уште Ивес Лампаерт и Тош Ван дер Санде, а фаворитите како Грег Ван Авермет, Матје Ван Дер Пуел и Жулиен Алафилип се пласираа во топ 20.
📸 Luc Claessen/Getty Images
