Во вториот меч од второто коло на новата АФЛ сезона, Сиднеј Свонс ги совладаа Џилонг Кетс со (17.5) 105-77 (10.17).
Џилонг го започна мечот со серија од 13-0, но до крајот на првата четвртина, Свонс поведоа со 27-16 и го држеа двоцифреното водство до последниот звук на сирената.
Главна атракција во триумфот на составот од Сиднеј беше легендарниот Ленс ‘Бади’ Френклин, кој имаше учинок од (4.0) и дојде до јубилејниот илјадити гол во АФЛ.
Френклин стана само шестиот фудбалер во историјата со илјада погодоци и прв од абориџинско потекло со вакво достигнување.
Освен него, до огромниот јубилеј имаат стигнато уште Гери Аблет (1031), Даг Вејд (1057), Џејсон Данстал (1254), Гордон Ковентри (1299) и Тони Локет (1360).
Поефикасен на денешниот меч од Френклин беа само неговиот соиграч, Ајзак Хини (5.0) и противникот Бредли Клоус (4.1).
На табелата, со натпревар повеќе во однос на конкурентите, Сиднеј е прв со две победи, додека Џилонг е шести со половичен учинок.
