Бруклин Нетс го задржаа победничкиот учинок, откако синоќа славеа над Атланта Хокс со 117-108.
Мечот се развиваше на неизвесен начин сè до средината на третата четвртина, кога Нетс стекнаа водство од +16 и го задржаа до самиот крај.
Од редовите на Хокс, убедливо најпрецизен беше Де’Андре Хантер со 26 поени и со 10/11 прецизни шутеви од игра, вклучувајќи и 6/6 тројки.
Од неговите соиграчи, дури тројца имаа по две двоцифрени статистики, односно Тре Јанг (21 поен и 10 асистенции), Клинт Капела (13 поени и 16 скокови) и Џон Колинс (13 поени и 12 скокови).
Кај Нетс, Џејмс Харден запиша дабл-дабл од 16 кошеви и од 11 асистенции, а најефикасен со 32 погодоци беше Кевин Дурент.
Заклучно со меѓусебната средба, Бруклин (5-3) го држи седмото, а Атланта (4-4) – единаесеттото место во Источната конференција.
