Со тоа што освоија поени на шест од последните седум средби, притоа победувајќи трипати во низа, Анахајм Дакс го држат солидното петто место во Западната конференција.
Синоќа, ,,Патките” со резултат од 3-1 ги поразија Аризона Којотес, кои и понатаму се последни како единствен тим во цела лига без ниедна победа.
Во првата третина, Адам Енрик и Сони Милано стрелаа за 2-0 во корист на Дакс, а третиот погодок беше дело на Сем Керик во вториот период.
Капитенот на домаќините, Рајан Гетцлаф, со новата асистенција кон Енрик, дојде до својот 990. поен во дресот на Анахајм што претставува нов рекорд на франшизата.
Голманот на Дакс, Ентони Столарц, одбрани 28/29 противнички удари (96,55%) и ја запиша својата прва победа во сезоната на четвртиот настап.
Походот кон неговиот втор шут-аут во дресот на Анахајм го расипа единствениот голгетер на Аризона, Шејн Гостисбер, кој стрелаше на осум секунди пред крајот.
