Кошаркарите на ТФТ го имаа своето прво гостување надвор од границите на Балканот. Дебитантот во нашиот шампионат, стигна да се натпреварува и со екипи надвор од овие простори, поточно, против еден од Израел.
А екипата на Хапоел Гилбоа Галил се „потсети“ како е да се игра против преставници од Македонија (порано играа со Торус СЦБТ, Фени Индустри). Епилогот помалку и очекуван. ТФТ загуби од поквалитетниот противник со резултат од 94:68, но од Израел ќе донесат искуство плус за она што следува во сезоната во која туркаат на два фронта, македонскиот и балканскиот.
Тренерот Боро Смилковски им даде шанса на сите десет кошаркари кои отпатуваа во Израел, а интересно, Андерсон остана единствениот „двоцифрен“. Австралиецот реализираше 19 поени, Бејли и Хортон имаа по 9 коша сосема премалку за нешто повеќе на овој меч.
Ова беше вториот пораз за нашиот претставник во втората фаза од Балканската лига. Следниот предизвик и шанса за прв триумф во групата, „Црно-белите“ ќе ја имаат на 29. март, кога му гостуваат на Берое во Стара Загора.
Фото и извор: https://kfsm.mk
