Вчера селекторот на машката ракометна репрезентација Кире Лазаров го имаше првиот собир на репрезентативците пред настапот на Светското првенство во јануари.
„Конечно дојде промената на составот со повозрасните ракометари, имавме голема помош во баражот, каде што целото искуство ни го префрлија нам и ни кажаа дека ние сме на терен и треба да бидеме лидери. Сепак, на големите натпреварувања е поинаку, секој втор ден се игра натпревар и затоа се собираме порано. Ни недостигаат само двајца ракометари, Кузмановски и Митревски, но овие 10 дена да ги искористиме за основни подготовки. Последните 10 дена пред настапот треба да видиме што ни недостига на тие контролни натпревари и потоа да ги коригираме грешките. Уште кога беше ждрепката, имав чувство дека ќе ни падне најтешката група и навистина е најтешка затоа што во останатите има некои африкански репрезентации. Кај нас се падна Аргентина од Јужна Америка, која во изминатиот период покажа дека има квалитет. Ова е тешка група, но одиме чекор по чекор. Треба да ги анализираме противниците, кои исто така ќе играат други натпревари. Ги знаеме добро сите селекции и се надеваме дека нашиот селектор ќе направи добра тактика за да се прикажеме во најдобро светло“, изјави еден од лидерите на нашата репрезентација Филип Талески.
