Македонските одбојкари повторно ќе играат на Европско првенство. Ја совладаа Турција со 3:1 (25:19, 21:25, 25:23, 25:18) и уште отсега обезбедија влез во континенталното елитно друштво. Никола Ѓорѓиев и Александар Љафтов одиграа маестрално, но имаа одлична поддршка од сите репрезентативци.
Капитенот Ѓорѓиев торпедираше со 24, Љафтов со 23 поени, Милев заврши со 5, Андонов и Николов со по 4, а техничарот Ѓорѓи Ѓорѓиев освои два поена. Македонската репрезентација одлично се бранеше од турскиот коректор Лагумџија и го задржа на 14 поени, а најефикасен беше примачот Субаши со 17 поени, сепак тоа не беше доволно ривалот да го запре нашиот тим, но и турците се радуваа затоа што го освоија првото место во групата Ц и ќе играат на еврошампионатот во Полска, Чешка, Естонија и во Финска.
Со три победи и со девет бода на турнирот во арената СЦ „Борист Трајковски“, македонските одбојкари имаа ист ефект како и турците, кои се првопласирани поради подобар сет-количник. Ние сме најдобри второпласирани од три завршени групи досега, така што не постои теорија која би попречила да играме на Европското првенство 2021 година планирано во терминот од 15-ти август до 30-ти септември.
Вторпат по ред, македонската одбојка слави пласман на континентален самит. Со јубилејната 70-та победа во официјалните 152 натпревара, ние сме во престижното друштво. Повторно голема радост за македонската нација. Македонија на Европскооооооо!
Извор: Одбојкарска федерација на Македонија
