Во претпоследното коло од англиската Национална лига беше одигран еден од најважните натпревари во целата сезона.
Имено, во директната битка за титула, односно за промоција во Лиг 2, Рексам го порази Стокпорт со 3-0.
Тимот од Велс, поради подобра гол-разлика за еден погодок го презеде врвот на табелата од денешниот ривал, кој има натпревар помалку во пресрет на последната рунда.
Во среда, Стокпорт ќе има шанса да се врати на врвот со триумф или со реми против Торки, а одговор на најважното прашање ќе се добие наредната сабота.
Денес, пред преполниот ,,Рејскурс Граунд”, мрежата на Бен Хинчлиф, двапати ја затресе Оли Палмер (34′, 46′) и еднаш Пол Малин (45+3′).
За Малин, ова беше дваесет и шести гол во сезоната, доволен за првото место во листата на стрелците.
Исто така, Рексам има тринаесет домашни натпревари во низа на кои Палмер или Малин постигнале по најмалку еден погодок.
