Иако во меѓувреме го освои ЕФЛ Трофи, екипата на Ротерам Јунајтед драстично ги намали своите шанси за директна промоција во Чемпионшип.
Имено, клубот од Јужен Јоркшир има три последователни лигашки порази во кои прими седум, а не постигна ниеден погодок.
Во заостанатиот меч од четириесет и првото коло, популарните ,,Милерс” беа поразени на ,,Фратон Парк” од Портсмут со 3-0.
За тимот од јужниот брег на Англија, ова беше четврта победа над истиот ривал на вкупно деветте меѓусебни пресметки во дваесет и првиот век.
Портсмут беше подобар тим на зелениот тревник, а до почетна предност дојде со дебитантскиот гол во новата средина на Кларк Робертсон (35′), кој во изминатите три сезони ги бранеше боите токму на Ротерам.
Во второто полувреме, во листата на стрелците се запишаа Маркус Харнс (59′) и уште еден поранешен играч на гостите, Џорџ Хирст (65′), кои го поставија конечниот резултат.
На табелата, Ротерам падна на третото место, додека Портсмут ја презеде десеттата позиција.
