Охрид ангажираше четворица македонски репрезентативци.
Големо голманско засилување на тимот на ГРК Охрид! 29 годишниот гостиварчанец Даниел Ѓорѓески (191cm и 91кг) следната сезона ќе го носи сино-белиот дрес.Ѓорѓески доаѓа во тимот на Гладијаторите по одличните настапи на унгарскиот тим Будакалас, а пред тоа настапуваше за најсилните тимови во Македонија: Металург, РК Вардар и Пелистер каде што во овие тимови има настапи во европските купови и регионалната Сеха Лига.
“Среќен сум што се враќам назад во Македонија и посебна чест ми е што ќе бидам дел од ваков одличен проект и тим како што е Охрид. Охрид е сериозна екипа со големи амбиции, а јас се надевам дека оваа сезона ќе ги исполниме сите цели и сите заедно ќе се радуваме на многу победи.” – изјави Ѓорѓески.
Македонското репрезентативно лево крило ќе го облече дресот на ГРК Охрид следната сезона.Гоце Ојлески е новиот член на Охрид. Ојлески има 33 години (180cm и 80кг).Ојлески доаѓа од првакот на Македонија, Еурофарм Пелистер, а пред тоа има настапувано и за Вардар и Металург, како и за романскиот Одорхеи. Во својата кариера има настапи во европските купови и регионалната Сеха Лига, како и постојано член на Сениорската ракометна репрезентација на Македонија.
“Драго ми е што ќе сум дел од ракометниот клуб Охрид, клуб кој што покажува сериозност и квалитет во македонскиот ракомет. Се надевам следната сезона ќе ни биде успешна и ќе славиме многу победи.” – изјави Ојлески.
Одличното десно крило Никола Стоилевски потпиша за Гладијаторите. Стоилевски има 24 години (194cm и 80кг) и имаше одлични настапи за Еурофарм Пелистер 2 во плеј-оф натпреварувањето. Пред тоа настапуваше за екипите на Еурофарм Пелистер, Металург и Бутел Скопје.
“Драго ми е што ќе бидам дел од екипа која има одлични планови и цели за во иднина кои би ми помогнале многу да напредувам како играч.” – изјави Стоилевски.
Најдобриот специјалист за одбрана во ракометна Македонијa станува Гладијатор.Милорад Кукоски е новиот член на семејството на ГРК Охрид. Искусниот Кукоски има 35 години (195cm и 100кг).Кукоски доаѓа од првакот на Македонија, Еурофарм Пелистер, а пред тоа има настапувано и за Металург, Зомимак и Вардар. Во својата кариера има настапи во европските купови и регионалната Сеха Лига, како и постојано дел од Сениорската ракометна репрезентација на Македонија.
“Мило ми е што доаѓам во клуб со европски амбиции, кој расте од година во година. Сигурен сум дека ќе ги оправдаме очекувањата на управата и публиката.” – изјави Кукоски.
