Трката за големата награда на Шпанија од овогодинешниот календар на Формула 1 заврши во рацете на Макс Ферстапен.
Актуелниот шампион дојде до дваесет и четвртата победа во својата кариера и го презеде водството во генералниот поредок.
На второто место, со напредок од три позиции во однос на квалификациите, се пласираше неговиот клупски колега Серхио Перез за двојна победа на ,,Ред Бул”.
Подиумот го комплетираше Џорџ Расел, а по него следуваа домашниот миленик, Карлос Саинц и вториот возач на ,,Мерцедес”, Луис Хамилтон, кој победи на претходните пет трки на оваа патека.
Во продолжение, во првите десетмина се најдоа уште: Валтери Ботас, Естебан Окон, Ландо Норис, Фернандо Алонсо и Јуки Тсунода.
Најголем трагичар беше Шарл Леклер, кој поради проблеми со болидот беше приморан да се откаже, иако имаше убедливо водство на врвот на средина од трката.
Моначанецот, поради триумфот на Ферстапен, го загуби и првото место во вкупниот пласман и падна на втората позиција со шест бодови заостаток.
