Според годишната програма на НУ Музеј Д–р Никола Незлобински за оваа година, биолошкото одделение ќе го реализира проектот: Колекционирање на видови од фауна на дно од Охридското Езеро со цел заштита на движното културно наследство.
Охридското Езеро е релативно големо, длабоко, потенцијално старо езеро со многубројни ендемични и реликтни растителни и животински елементи. Во редот на животински групи кои располагаат со голем биодиверзитет и богатство на видови спаѓа фауната на дно. Терминот фауна на дно означува оргами кои го населуваат дното на акватичните екосистеми постојано или пак на дното минуваат некоја од животните фази, а нивната улога за слатководните екосистеми е од големо значење. Тие се важен дел од синџирите за исхрана. Во оваа група спаѓаат полжави стари околу 30 милиони години, ендемични видови од групата на сплескани црви, пијавици, ракови, школки и многу други. Сите тие се значајни за еволуцијата на Охридското Езеро, но и за животниот свет воопшто.
Со реализација на овој проект би се колекционирале различни видови од фауната на дно од Охридското Езеро, кои би ја збогатиле музејската збирка изложена во Природонаучната поставка на Музејот.
Овој проект кустосите биолози ќе го реализираат во соработка со стручен тим од ЈНУ Хидробиолошки Завод – Охрид, а проектот ќе се одвива во неколку фази.
Првата фаза ќе ги опфати теренските активности за колекционирање на проби од различни локалитети на Охридското Езеро почнувајќи од месец Мај.
Втората фаза ќе биде лабораториска анализа и обработка на колекционираните проби од Охридското Езеро во лабораторијата на Одделението за фауна на дно при Хидробиолошкиот завод во Охрид.
Третата фаза ќе биде изложување на колекционираниот детерминиран материјал во Природонаучната поставка во Музејот при што ќе бидат изработени и стручни текстови за карактеристиките на видовите.
Со тоа би се реализирал овој проект во целост, а Музејот би се збогатил со музејски материјал од непроценливо значење за Охридското Езеро.





