После крајот на сезоната 2021/22, тренерот на англискиот шестолигаш Чорли, Џејми Вермиљо, одлучи да го напушти ,,Виктори Парк” со желба за нов предизвик.
Денес, 39-годишниот Вермиљо пронајде нов ангажман и остана во Националната лига Север.
Имено, Англичанецот потпиша договор со Бакстон, кој влезе во шестиот ранг како шампион на Премиер дивизијата на Северната Премиер лига (седма дивизија).
,,Не можев да и’ одолеам на оваа прилика. Амбициите на директорот и на сите членови на клубот се импресивни. Поттикнат од одличната навивачка поддршка и од целата заедница, веднаш ја прифатив понудата.” – рече Вермиљо.
На истата прес-конференција, директорот на Бакстон, Дејвид Хопкинс, се огласи:
,,Џејми [Вермиљо] е амбициозен млад лидер со искуство во шестата лига и во погорните нивоа. Очекуваме да се покаже како одличен ангажман.”
Вермиљо во сезоната 2018/19 го однесе Чорли во петтата лига за првпат после 29 години, но беше веднаш релегиран, пред сè поради големиот број на повредени играчи.
Минатата сезона, под негово водство, ,,Страчките” завршија на шестото место, но во четвртфиналето на плејофот загубија од новиот петтолигаш Јорк со 2-1.
