Францускиот Шамони е претпоследната станица од Светскиот куп во алпско скијање во машка конкуренција пред Светското првенство.
На денешната програма беше осмиот овосезонски слалом, односно првиот од двата во реномираниот ски-центар.
После првата серија, тројцата првопласирани се наоѓаа во само три стотинки: Марко Шварц (50,70), Рамон Ценхојзерн (+0,02) и Клеман Ноел (+0,03).
Истите скијачи се најдоа на подиумот и на крајот, со тоа што Ноел (1:38,58) триумфираше за првпат после една година и тоа на домашен терен.
На втората позиција се пласира Ценхојзерн (+0,16), а Шварц (+0,19) беше третопласиран.
Најголемиот јунак на денот беше Швајцарецот Лука Ерни, кој имаше убедливо најбрзо скијање во втората серија. Имено, Ерни беше претпоследен 29. скијач што успешно ја помина првата серија и накрај се пласираше на неверојатното четврто место.
Во продолжение, во првите десет се пласираа уште Михаел Мат (+0,63), Лоик Мејар (+0,72), Александер Хорошилов (+0,87), Алексис Пантуро (+0,89), Себастијан Фос-Солевааг (+0,99) и Кристијан Хиршбил (+1,20).
Тотално спротивно од Ерни, односно најголем трагичар на денот беше Хенрик Кристоферсен, кој направи колосална грешка уште на втората капија и не ја заврши првата серија.
📸 Stefan WERMUTH/AFP
