Интернационалната Федерација за фудбалска историја и статистика ја рангираше Македонија како 63-та фудбалска сила на светот за 2020 година, а на листата има вкупно 80 репрезентации.
Тоа е скок од 14 позиции во однос на рангирањето за 2019 година, кога бевме 77-ми на планетата, а напредокот секако се должи на големиот успех на Пандев и соиграчите, кои успеаја за првпат да се пласираат на Европско првенство во историјата на македонскиот фудбал.
Прва на ранг-листата на ИФФХС е Италија, четирикратниот светски првак, пред фудбалските велесили Англија, Бразил, Шпанија и Германија. Во Топ-10 се и актуелниот европски првак Португалија, потоа и Франција, која е светски првак, Парагвај, Аргентина и Еквадор.
Сите три наши ривали во првата фаза на Европското првенство се наоѓаат на листата, а најдобар ранкинг на 17-тото место има Австрија, селекција со која на 13 јуни ќе го играме првиот и историски меч на големите натпреварувања во Букурешт.
Холандија е веднаш зад нив на 18-тото место, а со Лалињата ќе го играме последниот меч во нашата група, во Амстердам на 21 јуни. Украина е на 21-вото место и со неа ќе го играме вториот меч на ЕП, во Букурешт на 17 јуни.
