Селекторот на хрватската ватерполо репрезентација, Ивица Туцак, раскажа какво непријатно искуство им се случило на ватерполо репрезентативците на Хрватска, додека тренирале во базен во Загреб за време на вчерашниот силен земјотрес кој ја погоди државата.
Хрватите се подготвуваат за настап на квалификацискиот турнир за Светската лига во унгарскиот Дебрецин, но ги прекинаа активностите и нема да тренираат до 2 јануари.
„Момците беа во водата, а и тие, како и сите ние кои бевме покрај базенот, не само што го почувствувавме земјотресот, туку беше страшно. Водата почна да се прелива преку рабовите на базенот, беше како да е цунами” – кажа за немилиот настан хрватскиот селектор. Хрватите на 8 јануари треба да играат со Црна Гора во четвртфиналето на квалификациите.