На премиерното издание на Трката на хероите во Кукуш (Грција), атлетскиот клуб ,,7ми Ноември” од Гевгелија се покажа во блескаво издание. Имено, македонските претставници освоија дури пет пехари и имаа победници и на двете трки.
На 4,5 километри, најбрз беше новинарот на ,,Јави се јужна”, Атанас Епов (14:56), а второто место го освои неговиот клупски колега, Ристо Чалков (16:20) пред Гркот Амбросиос Димитријадис (17:44), односно пред четвртопласираниот Никола Ковачев (18:20). Кај дамите, првите три места им припаднаа на Стела Маргаритиду (22:40), на Анастасија Перпериду (25:44) и на Стела Параскеа (26:24).
На подолгата дистанца од 10,7 километри, Тодор Анчев (45:45) беше прв, оставајќи ги зад себе Александрос Самарас (46:55) и Естатиос Адамидис (49:13). Во женска конкуренција, на подиумот завршија Марија Стаму (1:00:40), Стела Стаму (1:02:23) и Александра Скориду (1:04:44). Со пехари од Кукуш заминаа уште Стојан Делев (50:22) и Анастасија Џорлева (1:10:07), кои беа четврт, односно петта на втората трка, но први во своите соодветни категории. Воедно, оваа трка беше и најбројна за атлетскиот клуб од Гевгелија, кој замина за Грција со триесеттина учесници.
