Вториот овосезонски натпреварувачки викенд од Светскиот куп во нордиска комбинација во машка конкуренција се одвива во австрискиот Рамзау.
Првата серија се одвиваше на скокалницата ,,Матеншпрунганлаге” (ГС 98), а со скок од 94,5 метри, водечкиот во вкупниот поредок, Јарл Магнус Риибер ја зазеде првата позиција и им зададе заостаток поголем од половина минута на сите, освен на најблиските шест конкуренти: Јошито Ватабе (+0:10), Јоханес Лампартер (+0:12), Винценц Гајгер (+0:25), Рјота Јамамото (+0:27), Лукас Грајдерер (+0:29) и Еспен Бјорнштад (+0:30).
Во втората серија, индивидуалното скијање во Гундерсен стил на десет километри го донесе победникот. Имено, до првата победа сезонава накрај стигна Гајгер, кој во самиот финиш го отскија Риибер (+0,5). Тактиката на Норвежанецот се покажа како неуспешна, а се состоеше од бавно скијање на почетокот, со коешто им дозволи на ривалите да го водат темпото околу седмиот километар. На третото место се пласира Грајдерер (+1,3), а во првите десет се пласираа уште: Јоханес Лампартер (+7,7), Фабијан Рисле (+12,6), Илка Херола (+38,1), Јорген Граабак (+38,4), Теренс Вебер (+42,6), Ееро Хирвонен (+45,2) и Ерик Френцел (+46,8).