Италијанските медиуми со доза на критика кон тренерот Џенаро Гатузо ги потенцираа петмината фудбалери кои стратегот на Наполи и буквално ги смрзна на клупата во досегашните 14 кола во новата сезона во Серија А, а меѓу нив е и Елиф Елмас. Дијамантот на македонскиот фудбал играше само 402 минути, но и тоа е најмногу од сите „заборавени“ играчи на Наполи од Рино Гатузо.
Критиката е насочена кон шефот на стручниот штаб кој ја заврши годината без победа на три меча по ред, а се потенцира дека Елмас е скапо платен, над 16 милиони евра. Најмалку играше Фернандо Љоренте, само 20 минути и тоа на последниот дуел во 2020 година против Торино.
Во топ-5 малку користени, а скапо платени фудбалери се и Малкуит со само половина час минати на терен, потоа и Лоботка со 308 минути, а беше платен дури 25 милиони евра и Гулам со 311 минути. Додека Аркадиуш Милик воопшто не ги игра и тој ќе е првиот што ќе ја види излезната врата од тимот.
