Вкупно 43. издание на популарното рели Дакар се одржуваше од 3 до 15 јануари во Саудиска Арабија.
Оваа азиска држава беше домаќин на овој спектакл по вторпат во низа, а таму се тркаа вкупно 322 возачи во шест различни категории: мотоцикли, четирицикли, ССВ, лесни прототипови, автомобили и камиони.
Во прилог се наоѓа целосниот етапен преглед во автомобилската конкуренција, во која, Стефан Петерхансел, по рекорден четиринаесетти пат во кариерата, стигна до шампионската титула.
Етапа 1:
Карлос Саинц беше победник на првата етапа, пред Стефан Петерхансел (+0:25) и Мартин Прокоп (+3:18);
Домашниот возач Ал-Раџи загуби 20:16 минути поради дупната гума после 25 км. Иста судбина имаше и Себастијан Леб, кој трипати се соочи со овој проблем. Сценариото му се повтори и на Петерхансел, кој заврши втор поради дупната гума на 40 км до крајот. Негативно изненади Насер Ал-Атијах, кој заврши како десетти (+12 :30).
Етапа 2:
На втората етапа, Насер Ал-Атијах победи пред Стефан Петерхансел (+2:35) и пред Карлос Саинц (+9:17), кој имаше проблеми со навигација и со моторот.
Во вкупниот поредок, Петерхансел води во однос на Саинц и на Ал-Атијах.
Етапа 3:
Ал-Атијах победи на етапата, задавајќи им заостаток на сите останати од над неколку минути, за скок на второто место во поредокот, веднаш зад Петерхансел.
Саинц падна на четвртото место во генералниот пласман, а третото го презеде Матје Серадори. Причината за падот на Шпанецот беше заостатокот од 31:02 минути.
Етапа 4:
Ал-Атијах го намали својот заостаток во однос на Петерхансел за дополнителни 11 секунди, откако Катарецот заврши прв, а Французинот втор на четвртата етапа.
Третото место му припадна на Хенрик Латеган (+1:30), а по него следуваа Себастијан Леб (+2:36) и Карлос Саинц (+2:56).
Во генералниот поредок, Саинц го врати третото место (+35:19), откако Серадори заврши на 28. позиција на оваа етапа со заостаток од 25:48 минути за +51:58 во вкупниот пласман, доволно за шестото место.
Етапа 5:
Во пресрет на петтата етапа, Себастијан Леб доби казна од пет минути поради забрзано возење во несоодветен дел од патеката, а притоа доби заостаток од нови 50:18 минути.
Оваа етапа помина во знакот на Јужноафриканците, откако Жиниел де Вилиерс беше прв, а Брајан Барагванат беше втор (+00:58).
На третата и на четвртата позиција се пласираа Петерхансел (+02:25) и Ал-Атијах (+04:38), а Саинц беше деветти (+15:19).
Етапа 6:
Продолжи лошото сценарио за Леб, кој, поради механички проблем, загуби над два часа на шестата етапа.
До втората етапна победа на Дакар 2021 дојде Саинц, проследен од домашниот пилот Јазид Ал-Раџи (+4:03). На третата и на четвртата позиција се пласираа Ал-Атијах (+7:16) и Петерхансел (+7:34).
Етапа 7:
По денот за одмор следуваше маратонската етапа на којашто Јазид Ал-Раџи, за првпат после 2015, го предводеше цел грид на целта, а по него следуваше озогласеното трио: Петерхансел (+0:48), Саинц (+1:15) и Ал-Атијах (+2:48).
Етапа 8:
Ал-Атијах, на осмата етапа, стигна до четвртата овогодишна победа, претекнувајќи ги Карлос Саинц (+00:52) и Стефан Петерхансел (+03:03). Сепак Петерхансел остана на првото место во поредокот, но со предност од само 04:50 минути во однос на денешниот победник.
Етапа 9:
Клучната етапа со којашто Петерхансел си го поплочи патот кон титулата беше деветтата. Имено, Французинот победи за првпат на овогодинешното издание, задавајќи им огромен заостаток на Ал-Атијах (+12:00), кој трипати менуваше дупната гума и на Џиниел де Вилиерс (+12:19). Во поредокот, Ал-Атијах, после девет етапи, доцнеше 17:50 минути, а Саинц вкупно 62 минути. Во меѓувреме, казната од пет минути на Себастијан Леб, добиена пред петтата етапа, беше укината.
Етапа 10:
Исто како и на седмата етапа, Ал-Раџи стигна на целта пред тројцата првопласирани во вкупниот поредок. Овој пат, Саинц беше четврти (+4:12), а Ал-Атијах (+2:04), со второто место, го намали својот заостаток во однос на Петерхансел за 49 секунди.
Етапа 11:
На претпоследната етапа, популарното трио повторно го предводеше гридот, со тоа што Ал-Атијах победи по петти пат на Дакар 2021, завршувајќи пред Петерхансел (+1:30) и пред Саинц (+2:36).
Етапа 12:
Речиси ревијалната последна етапа му ја донесе победата на Карлос Саинц, односно титулата на Стефан Петерхансел. Французинот славеше по рекорден четиринаесетти пат со 13:51 минути предност во однос на Ал-Атијах. Саинц го заврши релито на третото место (+1:00:57).
Вкупен поредок:
- Стефан Петерхансел (44:28:11)
- Насер Ал-Атијах (+00:13:51)
- Карлос Саинц (+01:00:57)
- Јакуб Пржигонски (+02:35:03)
- Нани Рома (+3:21:48)
📸 Motorsport.com
