Пред само една година, дуелот помеѓу Гент и Клуб Бриж беше најквалитетен во Белгија, кога стануваше збор за позициите на табелата.
Сепак, оваа сезона ситуацијата е драстично поинаква со тоа што Бриж остана убедлив на врвот, а Гент се наоѓа на единаесеттата позиција.
Токму така остана состојбата на ранг-листата и после нивниот денешен меѓусебен заостанат дуел од 28. коло.
Имено, на ,,Геламко Арена” во Гент, Клуб Бриж убедливо триумфираше со 0-4.
Во првото полувреме, кое заврши без голови, Гент имаше подобри прилики, но противниците ја имаа контролата над топката.
Поквалитетната игра на Бриж дојде до израз во вториот период од мечот, кога во интервал од половина час, Синан Болат дури четири пати ја извади топката од својата мрежа.
Во два наврати, во листата на стрелците се запиша искусниот Холанѓанец, Бас Дост (52′, 67′), а помеѓу неговите погодоци прецизно шутираше 20-годишниот Шарл де Кетелере (63′).
Три минути после третиот гол, Дост му го отстапи местото на Даниел Перез, кој во 81. минута, го постигна својот прв сениорски погодок во дресот на Бриж.
За ,,Сино-црните”, ова беше прва победа над Гент после три меѓусебни пресметки, додека популарните ,,Бафалос” го запишаа најубедливиот овосезонски пораз.
📸 Jeroen Meuwsen/BSR Agency/Getty Images