Трите порази во финалните натпревари во периодот од 2015 до 2017, како и неуспехот на завршниот турнир во Скопје пред три години, создаваат притисок дека е крајно време златото да блесне на градите на македонските одбојкари. Ако се суди според квалитетот, црвено-жолтите се фаворити во пресрет на последните четири натпревари од Европската сребрена лига 2021. Во салата „Парк“ во Струмица, Македонија денеска ќе игра со Хрватска, а во второто полуфинале на завршниот турнир ќе се сретнат Данска и Унгарија. Против две од овие репрезентации имаме позитивен ефект, а единствено Хрватите можат да се пофалат дека имаат повеќе победи во меѓусебните пресметки. Но тоа е само уште еден мотив повеќе пред денешното соочување.
Сите клучни податоци посочуваат дека Македонија е фаворит не само во денешното полуфинале, туку и за златото, но останува задачата да се одработи докрај, а за да се случи тоа, потребни се само уште две победи, првата во шестото полуфинале за нас во натпреварувањето на ЦЕВ. Преносите од денешните натпревари во Струмица се на МРТ-3 од 16 часот и 50 минути.



