Третиот овосезонски велеслалом, кој е во склоп на четвртиот одржан натпреварувачки викенд од Светскиот куп во женска конкуренција, се одвиваше во францускиот ски-центар Куршевел.
На првите два овосезонски велеслаломи, на отварањето на сезоната во Зелден и на саботниот, победи Марта Басино, а на третото место заврши Петра Влхова. Единствената промена се случи на второто место, каде што прво се најде Федерика Брињоне, а потоа Сара Хектор.
Втората трка во Куршевел се одвиваше денес, откако вчера беше одложена поради неквалитетниот снег и лошите услови на патеката.
После првата серија, Микаела Шифрин го имаше водството, а заостаток под една секунда имаа само наредните четири скијачки: Марта Басино (+0,07), Федерика Брињоне (+0,14), Штефани Брунер (+0,70) и Теса Ворли (+0,88). Водечката во Светскиот куп, Петра Влхова, заедно со девет други натпреварувачки, помеѓу кои Алис Робинсон и Мина Фирст Холтман, не ја заврши трката.
Во втората серија, победничката на воведните два велеслаломи, Басино, не ја заврши трката, иако имаше една секунда предност. Брињоне, беше на чекор до триумфот, но во последната третина доживеа пад и сепак, херојски успеа да се извлече и да стигне до второто место (+0,82). Подиумот го заокружи Ворли (+1,09), а во првите пет се пласираа Мишел Жизен (+1,20) и Катарина Линсбергер (+1,54).
До 25. победа во кариерата во велеслалом, а воедно и до третата во истата дисциплина во Куршевел, стигна Шифрин (2:19,63). За неа, ова е прва победа после 26 јануари во Банско и беше особено емотивна, имајќи во предвид дека се најде на првата позиција за првпат по неочекуваната смрт на својот татко.



