Во склоп на минатата сезона требаше да одржи и Светското првенство во ски летови. Сепак, истото беше одложено поради пандемијата и беше закажано за претстојниот викенд на леталниците во областа Планица, Словенија.
На денешната програма беа првите две, од вкупните четири, планирани серии во индивидуална конкуренција.
Во првата серија, најдалеку летна Михаел Хајбок (245,5 метри), кој веќе два дена по ред има најдобри изданија.
Вреди да се напомене и летот од 237 метри на Евгениј Климов што, освен негов личен, претставува и национален важечки рекорд на Русија (Дмитри Василиев летна 254 метри во 2015, но при слетувањето го допре снегот). Токму овие двајца скокачи, заедно со првопласираниот Карл Гајгер, ги заземаа првите три места.
Во втората серија, победникот на вчерашните квалификации, Маркус Ајзенбихлер, го имаше најдалечниот лет во текот на викендот, кој гласеше 247 метри, доволен за третото место после две летања. На првите две позиции ќе ,,преноќат” Гајгер и Гранеруд, а од четвртото до десеттото место се наоѓаат: Михаел Хајбок, Роберт Јохансон, Јукија Сато, Пјотр Жила, Камил Штох, Евгениј Климов и Андржеј Стекала.
Во глобала, просечните летови го карактеризираа денешното натпреварување, пред сè поради фактот дека истото, за првпат досега, беше одржено под рефлектори. Имено, ветерот во Планица докажано им дува во грбот на летачите во попладневните и вечерните часови што претставува главна причина зошто натпреварувањата на леталницата ,,Братов Горишек” секогаш се одвиваат во утрешните термини.



