Од почетокот на сезоната, па сè до синоќа, екипата на Питсбург Стилерс беше единствената непоразена во НФЛ.
Сепак, нивната фантастична серија беше прекината од потполно неочекуван противник, Вашингтон ФК, кој триумфираше со 17-23. Со ова, поранешните Редскинс станаа тимот со најслаб учинок (4-7 во пресрет на мечот) во историјата што совладал ривал со 11-0 после првите единаесет средби.
Стилерс одлично го почнаа мечот со два тачдауни постигнати од Дионте Џонсон и од Џејмс Вашингтон, дозволувајќи само еден филд-гол на Дастин Хопкинс во завршните секунди од првото полувреме за предност од 14-3.
Во вториот дел, се сменија улогите на теренот. Имено, за Стилерс, единствените поени ги постигна Метју Рајт преку филд-гол, а Вашингтон додаде два тачдауни од Пејтон Барбер и од Логан Томас и два филд-голови на Хопкинс за конечен триумф.
Стилерс имаа напад за победа во завршницата, но истиот заврши со грешката на квотербекот Бен Ротлисбергер, кој ја подаде топката до противничката одбрана, односно во рацете на Џон Бостик.
Стилерс и покрај поразот остануваат најдобар тим во цела лига, а победата го издигна Вашингтон на осмото место во НФК и му даде предност во борбата за првото место во својата дивизија.
Во соработка со НФЛ Македонија



