Стефан Ристовски со својот тим Спортинг Лисабон го одбранија освоениот Лига куп трофеј од минатата сезона, овој пат во финалето по подобро изведување на пенали против Порто. Најнапред во полуфиналето беа поуспешни од Брага и тогаш по истиот рецепт, односно по подобро изведување на пенали. Во редовите на Спортинг Лисабон, Ристовски го одигра целиот натпревар, при тоа во второто полувреме заработи и жолт картон, а освен тоа тој одигра беспрекорно квалитетно.
Во меч каде што двете екипи повеќе внимаваа на својот гол отколку на противничкиот не можеше да се очекува натпревар со многу шанси и атракции. Во второто полувреме Порто нападна се со цел да дојде до водство, а таквиот пристап им се исплатеше затоа што резервистот Фернандо во 79. минута постигна гол за водство од 1:0.
Кога се чинеше дека за Спортинг сите надежи за поволен резултат се загубени во 89 минута фудбалерот на Порто, Оливер Торес направи невнимателен потез и во шеснаесетникот неспретно реагираше и го фаулираше Диаби за прекршок за пенал. Во прв момент главниот судија не забележа, но по прегледување на ВАР-системот одлучи дека има фаул за пенал кој што Баст Дост го претвори во гол за израмнување на 1:1.
Во Лига купот на Португалија во регуларните 90 минути поради реми резултатот веднаш се премина на изведување на удари од белата точка (нема продолженија од два пати по петнаесет минути), а во пенал рулетот три пати беа успешни фудбалерите на Спортинг Лисабон, додека Порто само еднаш беше прецизен и со вкупни 1:3 ,,Лавовите” го одбранија куп трофејот освоен минатата сезона.



