Со новата песна „ДОМ“, Давид Темелков носи емотивна музичка приказна за родниот крај, семејството, мајчината љубов и чувството на припадност. Ова е песна што потсетува дека, без разлика каде ќе нè одведе животот, постои едно место и една прегратка што секогаш остануваат нашиот дом.
Темелков ги потпишува текстот, музиката и аранжманот, а продукцијата е реализирана во Студио Identity Media. Продуценти се Зоран Швигир Швиги и Давид Темелков, додека миксот и мастерингот се дело на Студио Шишмиш. Бек-вокалите ги изведуваат Сузана Бранковиќ и Јелена Ѓуриќ од Студио Пегарт.
Посебна приказна носи и видеоспотот, за кој сценариото и режијата ги потпишува самиот Темелков. Видеопродукцијата е реализирана на повеќе локации низ Македонија и Хрватска, со директор на фотографија Лука Хорват – LIMMLENS, а во актерската екипа се Марија Кондовска, Владо Јовановски и Војдан Алексовски. За шминката се погрижи Јана Алексовска.
Во центарот на песната е мајчината прегратка, домот што чека и неизмерната љубов што не исчезнува, дури и кога километри нè делат од најблиските.
„Мајко ти не тагувај“ и „Каде и да одиш не заборавај, имаш еден Дом“ се стихови што ја носат суштината на оваа музичка приказна – искрен повик никогаш да не ги заборавиме своите корени.
„ДОМ“ не е само песна за оние што заминале. Таа е и потсетник за сите што останале, за нивното чекање, љубов и надеж дека повторно ќе ги дочекаат своите најмили.
Со ова музичко остварување, Давид Темелков испраќа силна порака за значењето на семејството, грижата за постарите и одговорноста да го чуваме она што нè поврзува со родниот крај.
Зашто, понекогаш, домот не е само место на кое се враќаме – домот е љубовта што нè чека.




