
Денес, за првпат откако се појави Коронавирусот, беше одржан првиот интернационален натпревар од НФЛ, во кој, на ,,Тотенхем Стадиум” во Лондон, Атланта Фалконс ги совладаа Њујорк Џетс со 27-20.
Претставниците на Џорџија ја завршија речиси целата работа во првото полувреме, после кое водеа со 20-3.
Сепак, иако се чинеше дека ќе изборат лесен триумф, ,,Соколите” потсетија на партијата од Супер Боул 51 и им овозможија на Џетс да се приближат на само еден посед разлика во четвртата четвртина.
Фалконс дојдоа во Велика Британија без главните фаќачи, Калвин Ридли и Расел Гејџ, чиешто отсуство беше релативно неприметно поради блескањето на новите ѕвезди.
Највисоко драфтуваниот тајт-енд во историјата на НФЛ, Кајл Питс, го постигна својот прв сениорски тачдаун и го заврши мечот со 9/10 фаќања за 119 јарди.
Од неговите соиграчи, тачдаун забележаа Мајк Дејвис и Хејден Харст, а заедно со квотербекот Мет Рајан (33/45 додавања за 342 јарди), важна улога имаше и Кордарел Патерсон со вкупно 114 освоени јарди.
Од редовите на Џетс, квотербекот Зек Вилсон покажа стандардно подобро второ полувреме и го заврши мечот со 19/32 прецизни додавања за 192 јарди и со еден пресечен пас.
Што се однесува до поентерите на номиналните гости, по еднаш топката во енд-зоната со трчање ја внесоа Тај Џонсон и Мајкл Картер, а шутерот Мет Амендола погоди два филд-голови.
После пет одиграни средби и двете екипи имаат негативен учинок со тоа што Атланта поседува 3-2, а Џетс – 1-4.
Во соработка со НФЛ Македонија



