Вук Лакичевиќ младиот ракометен џин кој доаѓа од Црна Гора е вистинско освежување за екипата на Струга и за целата Суперлига оваа полусезона на позицијата десен бек. Погледнете го краткото интервју на Вук специјално за порталот www.javisejuzna.mk:
Oд каде е Вук и кога започна да се занимава со ракомет ?
Потекнувам од Никшиќ, Црна Гора. Јас имам 19 години, а започнав да играм ракомет на 10 години.
Како дојде до трансферот во РК Струга ?
Трансферот во Струга дојде по препорака на капитенот на Струга, Богдан Николиќ и беше проследен со преговори помеѓу клубот и мојот менаџер Назих Ајлани.
Како си задоволен од своите игри и односот со твоите соиграчи и тренерот ?
Со оглед на тоа што лигата е многу силна и дека доаѓам од земја во која машкиот клупски ракомет е на лошо ниво, мислам дека завршив добра работа во првиот дел од сезоната. Секoгаш дури и кога давав полоши игри, имав голема поддршка од соиграчите и тренерот. Сигурен сум дека можам да напредувам уште повеќе и да покажам што знам, па се надевам дека тоа ќе го постигнам во плејофот.
Како ти се допаѓа Струга и луѓето кои живеат тука ?
Струга е прекрасен град низ кој поминува реката Црн Дрим и е сместен покрај брегот на Охридското езеро. Луѓето се многу љубезни и се чувствувам убаво да поминувам време во градот.
Дали уште некој од фамилијата се бави со ракомет ? Гледаме дека твојата фамилија aктивно го следи порталот www.javisejuzna.mk ?
Само јас играм ракомет во семејството. Mоите сестри, роднини и пријатели ја следат мојата работа, ми даваат максимална поддршка и затоа ги следат македонските портали …
Што ќе им порачаш на крај на струшките ракометни фанови ?
Како прво, би сакал да им се заблагодарам на струшките љубители на ракометот и навивачката група “Паткари” за нивната голема поддршка и за време на пандемијата. Би сакал да им порачам да бидат со нас во наредниот период и сигурен сум дека резултатите нема да изостанат.
