Последното натпреварување во слалом од Светскиот куп во алпско скијање во 2020 се одржа денес во италијанскиот ски-центар Мадона ди Кампиљо.
Воедно, ова беше и втор овосезонски слалом во машка конкуренција, одржан стандардно под рефлектори.
На првиот слалом отскијан вчера во Алта Бадија, триумфираше Рамон Ценхојзерн, пред Мануел Фелер и пред Марко Шварц.
Во првата серија, Себастијан Фос-Солевааг (47,34) потполно ги отскија сите конкуренти. Најблиски следбеници на Норвежанецот беа Ценхојзерн (+0,40) и Алекс Винатцер (+0,50).
Во втората серија, Хенрик Кристоферсен направи сензација, откако од 12. позиција стигна до 22. победа во кариерата. Фос-Солевааг (+0,33) го освои својот прв пласман на второто место во кариерата, а по вторпат на пиедесталот се најде домашниот скијач – Винатцер (+0,34).
На Мануел Фелер (+0,35), подиумот му побегна за само една стотинка, а позади него се пласира Французинот Клеман Ноел (+0,44).
Шестото место (+0,54) го поделија вкупно тројца скијачи – Алексис Пантуро, Линус Штрасер и Жан-Баптист Гранж.
Марко Шварц (+0,58) и Кристофер Јакобсен (+0,61) го комплетираа пласманот во првите десет.
