Вечерва продолжува најинтересниот тек од Лигата на шампионите со нокаут фазата, а први дуели кои ќе ја отворат 1/8 финалната фаза се Манчестер Јунајтед и ПСЖ на ,,Олд Трафорд” и Рома против Порто на ,,Олимпико” во Рим.
Мега дуелот помеѓу ,,Црвените ѓаволи” и ,,Светците” ќе биде вистинско уживање за сите неутрални љубители на фудбалот затоа што се очекува пред се неизвесен и драматичен двомеч, а пред се натпреварот да се карактеризира со атрактивна игра, динамика и голем број на шанси на двете страни.
За време на ждрепките французите со задоволство ја примија веста дека ќе се соочат со тимот на Манчестер Јунајтед, но за неколку месеци оттогаш се променија многу работи и по преземањето на клупата од страна на Оле Гунар Солскјер работите се сосема поинакви и како фаворит се издвојува англискиот преставник.
Норвежанцот на клупата на англискиот великан нема загубено натпревар и ова за него ќе биде деби настап во Лигата на шампионите. Од друга страна тренерот на ПСЖ, Томас Тухел има многу проблеми со повредени фудбалери пред се на првите ѕвезди Нејмар и Кавани. Тухел за француските медиуми изјави дека не е среќен што во ваков момент треба да се соочи против Манчестер Јунајтед и дека неговите фудбалери ќе имаат тешка задача.
Вториот натпревар од отворањето на најелитната фаза на натпрерварување е дуелот помеѓу Рома и Порто. Овој дуле е во сенка на мега пресметката во Англија, но сепак многу важен меч за двете екипи кои од ,,сенка” ќе се борат со најголемите европски тимови за висок пласман.
,,Римската волчица” влегува во овој двомеч како аутсајдер од проста причина што тренерот на Рома, Ди Франческо долго време е под притисок дека може да добие отказ поради лошите резултати, а од друга страна ниту нивните навивачи не се среќни како игра нивниот омилен тим.
Порто е во натпреварувачка форма, каде што во домашното првенство е лидер на табелата, а во Лига на шампиони ќе се обидат да се пласираат во 1/4 финалето. Првиот меч се игра на стадионот ,,Олимпико” во Рим каде што Рома има проблеми и со повредени фудбалери во прв план, голманот Олсен, Манолас, Ундер, Шик и Пероти што е сериозна бројка на отсутни играчи. Сепак и на овој дуел се очекува до крај неизвесна борба за пaтникот во наредна фаза.



