ФФМ има закажано изборно собрание кое треба да се одржи во недела во Охрид каде ќе се избира претседател на федерација по оставката на Илчо Ѓорѓиевски. Како главен и во овој момент и единствен кандидат на тоа собрание е в.д претседателот Мухамед Сејдини.
Агенцијата за Млади и Спорт (АМС) реагира на ова закажано собрание и упатува директно писмо на Македонската фудбалска федерација (ФФМ) дека тоа собрание е нестатутурно и пред тоа да се одржи треба да се усогласат Статутот и другите акти со Законот за спорт.
АМС е сосема конкретна и јасна во своите ставови дека најбогата федерација во Македонија на последниот инспекциски надзор воочиле многу неправилности во работењето во федерацијата. Исто така во изминатиов период агенцијата писмено и усмено укажувала на грешките, пропустите и неправилностите, но од федерацијата со статутарни промени направија само ,,шминка” за демократски избор во кој делегатите и составот на Управниот одбор остануваат исти, а само би се сменил претседателот.
Истовремено, претставниците на АМС во својот допис до Куќата на фудбалот бараат и сите здружени членки на ФФМ да го усогласат своето работење и актите согласно Законот за спорт, барајќи сите актери истовремено да го почитуваат Уставот на државата и сите останати закони.
И на крај АМС од ФФМ бара да се преземат итни мерки и активности со кои ќе се направат укажаните промени, со цел да се усогласи работењето со Законот за спорт, а со тоа и да се одржи валидно и регуларно Собрание. Ако не се случи тоа, следува – укинување на решението за дејност спорт.



