Во првото коло од плеј-офот на македонското ракометно првенство, Вардар 1961 славеше во Скопското дерби против младиот тим на Алкалоид со резултат 34-26 (15-13). Натпреварот се одигра во спортскиот центар „Јане Сандански“ и започна со минута молк во чест на жртвите од трагедијата во Кочани.
Актуелниот освојувач на Купот на Македонија, Вардар 1961, во овој дуел влезе само два дена по мечот против Баја Маре за пласман во полуфиналето на ЕХФ Европскиот Куп. И покрај напорниот распоред, тимот предводен од Кирил Лазаров успеа да одигра квалитетен натпревар и да ги освои важните бодови.
На оваа средба, тренерот Лазаров не можеше да смета на Марко Митев, Никола Костески, Кристијан Симоноски и младиот Дамјан Митев. Сепак, Вардар 1961 имаше доволно квалитет и искуство за да дојде до триумф.
Клучна фигура во победата беше голманот Фереира, кој блесна со 14 одбрани. Во нападот, Борозан беше најефикасен со 9 голови, додека Хориха постигна 6 погодоци. Дополнителна поддршка дадоа и Серафимов со 8 голови, Стојковиќ со 5 и Велковски со 4 погодоци.
Младиот тим на Алкалоид покажа борбеност и квалитет, но не успеа да се носи со искуството и силата на Вардар 1961. Овој пораз ќе биде значајна лекција за нив, а тимот ќе има можност да се подобри во наредните натпревари од плеј-офот.




