Ракометарите на Струга вчера ги започнаа подготовките за новата сезона во Суперлигата. Струга годинава се одлучи за неколку искусни ракометари во составот кои треба да ги предводат помладите. Нови имиња во тимот се повратникот во матичниот клуб после повеќе од дваесетина години Златко Мојсоски. Потоа искусните Велко Марковски, Јовица Младеновски, Александар Тренчевски. Нов ракометар е и младиот десен бек Мерис Бошњак, кој лани играше за Еурофарм Пелистер 2.
Струга годинава ги продолжи договорите со голманот Дејан Рикановиќ и бековите Петар Бугариновиќ и Бобан Савески. Нови имиња во составот се младите Филип Мечкароски, Филип Велјаноски, Јосиф Гускароски, Филип Симоноски и Бобан Мечкароски кои доаѓаат од младинските категории на клубот. Со екипата во моментов работи Сашо Србиноски во отсуство на тренерот Наум Танески, кој е со кадетската репрезентација на Македонија на СП во Хрватска.
