Алексо Лембанов ќе продолжи да го води Тинекс Пролет и во вториот дел од натпреварувачката сезона, одлучи управата на клубот по консултациите и разговорите што ги имаше во изминатиот период. Екипата на Тинекс Пролет денеска ќе ги стартува подготовките за вториот дел, под водство на младиот стручњак кој го водеше тимот и во последните натпревари од 2021 година.
Лембанов пристигна во клубот пред повеќе од една година и беше дел од стручниот штаб на Матлиески, Кастратовиќ и на Андон Бошковски, а токму по прекинот на соработката со Бошковски беше донесена одлука тој да остане и да добие шанса како прв тренер. Иако резултатите беа променливи, напредокот во играта беше значителен, што е главна причина Лембанов да биде задржан на клупата и да добие шанса до крајот на сезонава.



