Европското првенство во ракомет 2026 добива нова ѕвезда со македонски потпис. Филип Кузмановски со своите партии се најде рамо до рамо со најголемите имиња на турнирот – Митун Oли, Елиас Скипаготу, Блаж Јанц, Матијас Гидсел и Домен Макуц, елита која во моментов го диктира европскиот и светскиот ракомет.
По само два одиграни натпревари, Кузмановски веќе има 27 поени (19 гола + 8 асистенции) бројка што го сместува во самиот врв на листата за МВП. Во конкуренција на ракометари кои доаѓаат од репрезентации со огромна традиција и длабок ростер, македонскиот бек покажа дека квалитетот не признава големина на земја, туку срце, техника и храброст.
На врвот моментално се Фарските Острови со феноменалниот Митун (31 поен), веднаш зад него е клупскиот колега Скипаготу (28), а тука се и Блаж Јанц и данскиот лидер Гидсел – играчи кои веќе се етаблирани ѕвезди на европската и светската сцена. Фактот што Кузмановски се наоѓа во ова друштво е јасен показател за неговиот моментален врв и зрелост како лидер.

Она што особено импресионира е начинот на кој Филип ги постигнува головите – со силен шут од дистанца, продори во клучни моменти, асистенции и преземање одговорност кога е најтешко. Тој не е само стрелец, туку и мотор на македонската игра, играч кој инспирира и ја носи репрезентацијата напред.
Настапите на Кузмановски се јасна порака до ракометна Европа: Македонија повторно има играч од највисока класа. Во друштво на Митун, Скипаготу, Гидсел и Макуц, неговото име веќе не е изненадување, туку реалност што заслужува респект.




